الشاعر . احمد سليمان ود الابيض

📌الحمد لله حمد الذاكرين الطيبين ونصلي ونسلم على المبعوث رحمة للعالمين سيدنا ونبينا (محمد) صلى الله عليه وسلم، رمضان كريم عليكم تصوموا وتفطروا على خير ان شاء الله، نحن سعداء جدا بمناسبة هذا الشهر العظيم نسأل الله القبول والتوفيق والسداد، في هذه الامسية الطيبة سعيد جدا ان أقدم برنامج حوارات ملهمة عبر صحيفة الشعب الكترونيه، وسعيد جداً باستضافة الشاعر احمد سليمان ود الابيض، اهلا ومرحب بك في صحيفة الشعب الإلكترونية .

▪️ وعليكم السلام ورحمة الله وبركاته حبابكم الف وميه وانا اكثر سعادة،  تقبل الله الصيام والقيام وأعاده الله علي الجميع بالخير والبركه والوطن العزيز نتمنى له الاستقرار والامن والامان .

📌مرحب بيك للمرة الثانية الشاعر احمد سليمان وبداية عايزنك تدينا بطاقة تعريفيه عنك من حيث الميلاد والنشأة؟

▪️ احمد سليمان محمد، الميلاد والنشأة والدراسة حتي المتوسطة بالأبيض ثم الالتحاق بالجيش- ودراسة الثانوي بجنوب السودان، و الشهادة السودانية بمدرسة توريت شرق الاستوائية، و دبلوم إدارة اعمال بجامعة امدرمان الاسلامية فرع جوبا ثم بكالاريوس اللغة العربية بجامعة السودان

📌نسمع كثيرا عن النم وشعر الدوبيت استاذ احمد متى كانت البداية في مجال الشعر وكتبت شنو من الأشعار؟

▪️ الدوبيت هو شعر الباديه والنم واحد من طرق اداء الدوبيت، ام بدايتي فكانت مبكره وانا في الصف الثالث ابتدائي، حيث كنت في البداية احاكي واجاري ود ام سياله- تيراب- ود امبده وغيرهم من شعراء بادية كردفان، وكتبت اول قصيدة بعنوان الوصية :

ابوي قال لي ما تلهيك عروض الشاشه 

والشيك المحمله في الجيوب غشاشه

حقات جدك الطورية والمنجل مع الحشاشه

والابل الكراعن في الوعر دقاشه 

قلت لو يا ابوي النية كلا وحاشه

يا المنك ورثت هيبة اسود وبشاشه

وعد مني ليك حتى العمر يتلاشي 

لا بخاوي الجبان لا بصادق الشماشه 

قال لي الخمور ديك للعقل طرطاشه 

ابعد من دريب البشربو الدواشه 

اولاد النسون يدهم هباشه 

خليك ودرجال عين الزمن فتاشه

📌طيب استاذ احمد، ذكرت انك درست ادارة اعمال وايضاً اللغة العربية، مؤكد أن لديك كمية من النجاحات اللتي حققتها في حياتك، نريد أن نتعرف كيف وصلت لها؟

▪️ بالتأكيد، التحصيل العلمي يدعم الموهبة ويصوب المبدع ويرفده بالمعاني ومترادفات الكلمات، اما مكتبة الباديه كانت مجموعه من الشعراء والمبدعين والاعلامين والان اصبحت مؤسسة ادبية كبيره ساهمة في تقديم عدد كبير من المبدعين الشباب حيث كانت لهم منصة انطلاق وهذه هي واحده من ما تقدمه المكتبة للمواهب بصفه عامه والمبتدئين خصوصا، ولها كما تعلمون منتديات راتبة ومهرجانات وتضم عضويه كبيره داخل وخارج السودان ولها منتدى متجول في كل ربوع السودان .

📌نعم وبالتأكيد مكتبة البادية واحدة من المؤسسات التي تعكس ثقافات جميله جدا للتراث الكردفاني وغيرها من الابداعات المختلفة، حسناً ماهي الصعوبات التي واجهتك في مرحلة تأسيس هذه المؤسسة ؟

▪️ البناء والتأسيس يحتاج صبر ولابد من العزم في مجابهة التحديات ولكل مشروع ناجح قصة، مكتبة البادية مرت بمراحل في طريق التطور حتى بلغت هذه المرتبه وهنا لابد من شكر جميع الاخوان من المبدعين والاعلاميين الذين وقفوا ودعموا هذه الفكرة ومازال الطموح اكبر.

📌طيب استاذ احمد الشعر هل هو موهبة ولا مهارة ممكن نتعلمها زي ما نرى الان كثير من الناس بيكتبوا وايضا كثير منهم مبدعين نشوفهم في وسائل التواصل الاجتماعي وغيرها

▪️ الشعر موهبه والشاعر يولد شاعر صحيح الموهبه تحتاج صقل والشاعرية تتمرحل من مبتدي الي مجيد حتي بلوغ مرحلة الفحوله .

📌استاذ احمد نعلم ان بلادنا كثرت بها المصائب بسبب هذه الحرب اللعينة ماذا كتبت في ظل هذه الظروف؟

 ▪️ ودي قصيدة بتحكي عن الوضع :
في البلد المساحتا بالاجاويد حبلى 

فرش الضيف وسجاد الصلح ما ببلى

اهل الدين واهل العرف واهل القبلى

مفتاح البصارة الما كسر للطبله 

قصدي القادة والعمد والشيوخ والعامه

اعني عباقرة الراي العقولهم تامه 

الراكوبة والشجرة ام فروع 

حلالات عقد محنا يقلبن طامة

قوانين عدلنا المن الجدود موروثه

ركازة بلدنا الا كسر لا سوسه 

القاضي ومحاكمو وسلطتو المدروسه

ما بتتجاوز الماسكين عصاية موسى

📌طيب ذكرت انو الشعر موهبة والموهبة بتصقل بالتجارب منو من الناس البتحبهم في مجال الشعر وبتسمع ليهم ولي حكاويهم وتستفيد منهم ؟

▪️ كل شعراء الباديه السودانية القدامى تيراب ود ضحويه وعمر الشيخ رباح ود شوراني- عبدالله ود ادريس وعدد كبير خصوصا اصحاب النمه مثل العطوي وقسم الله وود ام سياله .
📌انا داير منك وصية أو رسالة موجه للشعب السوداني وهو بعيش ايام عصيبة من سرقه ونهب وبعض من ظروف الحياة القاسية ؟

▪️ اوصي نفسي والجميع بتقوى الله، واقول للذين ينهبون ويسرقون وينتهكون حرمات الناس لهؤلاء الضعفاء رب قوي ودعوة المظلوم لاترد الصبر ثم الصبر سوف ياتي الفرج.

📌نحن وصلنا لخواتيم حوارنا، الشاعر احمد سليمان وقبل ما نختم عايزنك تكتب حاجة من زوقك غزل ولا دوبيت 

▪️ كتبت قصيدة للغرة :

جمال محبوبتي يا العندك نواصي القافيه 

في الانسان وفي الحيوان وفي الجغرافيا

امي الغرة محبوبتي ام رهود صافيا

 فيها بغني حدما فيني زرة عافيه 

جمال معشوقي يا اخوي الرشيد البري

موصوف بيهو انسانا وغزالها البري 

بيوت ام مبدة والصافيه وعمارات بري

ماسكنتنا لكن الظروف بتوري 

وكان الغرة شالت حصتين في ميولي 

م معناها شادة العنصريه خيولي 

العلم البتب شن عزفو واقف طولي 

سودان حجمو مليون ميل مربع طولي

📌شكرا جزيلا الشاعر المتميز جدا احمد سليمان ود الابيض لضيافتك عبر صحيفة الشعب الإلكترونية، نتمنى لك التوفيق والسداد وأن تقف هذه الحرب في بلادنا، والسلام عليكم .